“Уйда қол – ғалаба қозон”: Бугун шахмат бўйича онлайн мусобақанинг иккинчи тури бошланади

“Уйда қол – ғалаба қозон” шиори остида ташкил этилган шахмат бўйича онлайн Ўзбекистон мусобақасида қатнашиш учун шу кунгача 3 500 нафардан ортиқ юртдошимиз CHESS.COM сайтида “Ўзбекистон Республикаси Жисмоний тарбия ва спорт вазирлиги” https://www.chess.com/club/uzbekiston-respublikasi... саҳифаси орқали рўйхатдан ўтишгани ҳақида хабар бергандик. Бироқ бу сўнгги чегара эмас ва мусобақада қатнашиш истагидаги юртдошларимиз бемалол, ҳозирнинг ўзидаёқ юқорида кўрсатилган манзил орқали рўйхатдан ўтишлари ва шахмат бўйича онлайн Ўзбекистон мусобақасига қўшилишлари мумкин.

Бугун, 10 август куни ушбу онлайн мусобақанинг иккинчи турнирига старт берилади. Иккинчи турнир ўйинларига 19 августда якун ясалади.

Эслатиб ўтамиз, ҳар бир турнир якунига кўра энг кучли 10 нафар шахматчи саралаб олинади. Улар эса жорий йилнинг 20 декабрида Тошкентда ўтказиладиган Grand Finalда қатнашиш ҳамда мусобақа ғолибига айланиб, Spark автомобилини қўлга киритиш учун ажойиб имкониятга эга бўлишади. Шошилинг, имкониятни қўлдан бой берманг. Карантин даврида шахмат ўйнанг ҳамда Янги йилни янги автомобиль билан кутиб олинг!

Ўйинлар ҳар куни Тошкент вақти билан соат 20:00да бошланади.

Барчага омад тилаймиз!