Вадим Епанчинцев: Тошкентда яхши муз саройи борлигини эшитгандим, бу ерга келиб шунга амин бўлдим

"Ўйин яхши бўлди. Бу биз учун мавсумдаги учинчи сафар ўйини. Кўрсатмаларни тўғри бажарган жамоамга раҳмат. Дарвозабонимиз яхши ҳаракат қилди. Аммо, кўпчилик кераксиз вазиятда четлатилди, айниқса ўйин охирида. Бу бизнинг нуқсонимиз. Ўйлайманки, бу нарса жойига тушиб кетади", - деб сўз бошлади мураббий.

-Ўйинда икки етакчингиз иштирок этмади. Берлёв нима учун баҳсда ўйнамади? Иккинчи саволим, "Ҳумо" гол киритган вазиятда танаффус олдингиз. Нима учун?

-Берлёв оилавий сабабларга кўра бугун ўйнамади, у иккита сафар ўйинимизда қатнашганди. У фарзандли бўлди ва шунинг учун уйига жўнаб кетди. Олинган танаффус ҳақида гапирадиган бўлсам, буни рақиб темпини тушириш учун керак деб ҳисобладик. 

-Ўзбекистонга хуш келибсиз. "Ҳумо" илк маротаба ВХЛда қатнашмоқда. "Ҳумо Арена", Тошкент шаҳри ҳақида фикрингиз қандай?

-Шахсан мен илк маротаба бу ерга ташриф буюрдим. Аввал Тошкентда яхши муз саройи борлиги ҳақида эшитгандим. Бугун шунга амин бўлдим, йигитлар учун бу ерда хоккей ўйнаш жуда қулай.