Вазирликда «Ўзбек тилининг изоҳли луғати» китобининг тақдимоти бўлиб ўтди

Унда вазир ўринбосари Нодир Муротов Давлат тили борасидаги ислоҳотларнинг мантиқий давоми сифатида Ўзбекистон Республикаси Президентининг 2019 йил 21 октябрдаги «Ўзбек тилининг давлат тили сифатидаги нуфузи ва мавқеини тубдан ошириш чора-тадбирлари тўғрисида»ги ПФ-5850-сон Фармонига мувофиқ, Ўзбекистон Республикаси Вазирлар Маҳкамаси тузилмасида Давлат тилини ривожлантириш департаменти ташкил этилганлиги ҳамда қисқа муддатда Ўзбек тилининг халқимиз ижтимоий ҳаётида ва халқаро миқёсдаги обрў-эътиборини тубдан ошириш, униб-ўсиб келаётган ёшларимизни ватанпарварлик, миллий анъана ва қадриятларга садоқат, улуғ аждодларимизнинг бой меросига ворислик руҳида тарбиялаш, мамлакатимизда давлат тилини тўлақонли жорий этишни таъминлаш борасида салмоқли ишлар амалга оширилаётганлигини маълум қилди.

Бунинг тасдиғи сифатида Давлат тилини ривожлантириш департаменти буюртмасига асосан, Ўзбекистон Республикаси Фанлар академияси Ўзбек тили адабиёти ва фольклори институти мутахассислари томонидан беш жилдли «Ўзбек тилининг изоҳли луғати» китобининг чоп этилганлиги муҳим аҳамият касб этиши таъкидланди.

Йиғилишда Жисмоний тарбия ва спорт вазирининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси Зокир Расулов ҳам беш жилддан иборат «Ўзбек тилининг изоҳли луғати» китоби тўғрисида ўз фикрларини билдириб ўтди. Жумладан, мазкур тўплам 80 000 дан ортиқ сўз ва сўз бирикмаларидан иборатлиги, муассаса ва ташкилотларда фаолият юритаётган ходимларнинг давлат тилида иш юритиш саводхонлиги ва малакасини ошириш, билимларини бойитишга кўмаклашишда асосий восита эканлигини маълум қилди.

«Ўзбек тилининг изоҳли луғати» китоби вазирликнинг бошқарма ва бўлим бошлиқлари, шунингдек, соҳа мутахассислари томонидан катта қизиқиш ва мамнуният билан қабул қилинди.