Велотрек бўйича Ўзбекистон чемпионатида ғолиблар аниқланди

Мусобақанинг сўнгги кунида йигитлар «Омниум-1», 21 айлана скретч гуруҳ пойгасида ўзаро рақобатлашди. Унда Алимардон Жамолиддинов 40 очко билан ғалаба қозонган бўлса, қизлар ўртасидаги «Омниум-1», 15 айлана скретч гуруҳ пойгасида Самира Исмоилова ҳам 40 очкога эга чиққан ҳолда, мамлакат чемпионига айланди.  

«Омниум-2», 18 айлана темпо гуруҳ пойгасида Алимардон Жамолиддинов олтин медални қўлга киритган бўлса, «Омниум-2», 12 айлана темпо гуруҳ пойгасида Самира Исмоилова ғолиб бўлди. Шунингдек, «Омниум-3», чиқариб юбориш гуруҳ пойгасида Беҳзод Нурматов ва Арина Макаркинага тенг келадигани топилмади.  

«Омниум-4» йўналишида йигитлар 48, қизлар эса 36 айлана гуруҳ пойгасида куч синашди. Унда Алимардон Жамолиддинов 165 очко билан мамлакат чемпионига айланган бўлса, Самира Исмоилова 145 очко жамғариб шоҳсупанинг энг юқори поғонасидан жой олди.  

Велотрекнинг кейрин баҳсларида Самандар Ражаббоев ва Алина Бакчеева олтин медаль билан тақдирланди.