WBC бир нечта номинация бўйича 2025 йилнинг энг яхшиларини аниқлади (Барча номинация ғолиблари)

Энг нуфузли - "Йил боксчиси" номинациясида биринчи ярим енгил вазн тоифасида мутлақ жаҳон чемпиони, ўтган йили тўртта муваффақиятли чемпионлик ҳимоя жангини ўтказган Наоя Иноуэ ғолиб деб топилди.  

WBC талқини бўйича "Йилнинг энг яхши жанги" иккинчи ўрта вазн тоифасида вақтинчалик чемпионлик учун Кристиан Мбилли ва Лестер Мартинес ўртасидаги жанг эътироф этилди. Ушбу жанг 13 сентябрь куни бўлиб ўтганди. Икки истиқболли ва мағлубиятсиз боксчилар ўртасидаги ушбу жангда дуранг натижа қайд этилган эди.

Супероғир вазнда WBC, IBF ва WBO йўналишлари чемпиони Александр Усик "Йилнинг энг яхши нокаути" мукофотини қўлга киритди. Украиналик боксчи ўтган йилнинг июль ойида Даниэль Дюбуага қарши мутлақ жаҳон чемпионлиги унвони учун кечган жангда британиялик рақибини нокаутга учратганди. 

WBC йилнинг энг яхши мураббийи совринини икки ота-мураббийлар Шинго Иноуэ ва Фредди Фундора ўртасида тақсимлашга қарор қилди. Шуниси қизиқки, ҳар иккала ота ҳам, мураббий ҳам бир эмас, бирданига иккита фарзандини муваффақиятга олиб келишган. Шинго Иноуэ мутлақ жаҳон чемпиони Наой Иноуэ ва WBC чемпиони Такума Иноуэ, Фредди Фундора эса энг енгил вазн тоифасида мутлақ жаҳон чемпиони Габриэла Фундора ва WBC чемпиони Себастьян Фундорага мураббийлик қилмоқда.

Айнан Габриэла Фундора WBC томонидан аёллар ўртасида "Йилнинг энг яхши боксчиси" совринини қўлга киритди.