WBC ва IBF Усик - Уайлдер жангига рухсат берди

Украиналик чемпион ушбу жанг учун Жаҳон бокс кенгаши (WBC)дан рухсат олди. Бу ҳақда WBC президенти Маурисио Сулаймон Sky Sports’га берган интервьюсида маълум қилди.

"Деонтей Уайлдер рейтингда 8 ёки 9-ўринни эгаллаб турибди. Шу боисдан у Александр Усикка қарши рингга чиқишни истаса, унда даъвогарлик қилиш ҳуқуқи бор. Усик камарини ихтиёрий ҳимоя қилиш учун ариза берди ва бугун у ташкилот томонидан маъқулланди", - деди Сулаймон.

IBF ҳам Усикнинг Уайлдер билан жанг қилишига қарши эмас.

"IBF камарини мажбурий ҳимоя қилиш муддати келган тақдирдагина бу биз учун муаммога айланади. Ҳозирги ҳолатда биз бунга қарши эмасмиз", - дейди IBF расмий вакили.

Шу ҳафта бошида украиналик боксчи фаолиятини якунламоқчи эмаслиги ва кейинги рақиби америкалик Деонтей Уайлдер бўлишини хоҳлаётганини айтганди. Собиқ жаҳон чемпиони Деонтейнинг жамоаси ҳам бу таклифни катта иштиёқ билан қабул қилди.