WBO Сауль Альварес камарига расмий даъвогарни аниқлайди

Ташкилот икки вазнда жаҳон чемпиони, америкалик Деметриус Андраде (31-0, 19 KO) жамоасининг таклифини қаноатлантирди. Андраде иккинчи ўрта вазн (76,2 кг.гача) тоифасидаги даъвогарлар жангида рингга чиқиш таклифини берган эди.   

Аввалроқ, ўрта вазн (72,6 кг.гача) тоифасида WBO чемпиони бўлган Андраде айнан Сауль Аьварес билан жанг сабаб ўз камаридан воз кечганди.  

Катта эҳтимол билан америкалик 34 ёшли Деметриуснинг даъвогарлар жангидаги рақиби британиялик 28 ёшли Зак Паркер (22-0, 16 KO) бўлади. Аслида бу икки жангчи шу йилнинг май ойида ўзаро тўқнаш келишлари керак эди. Лекин Андраденинг елкасидан олган жароҳати сабаб ушбу жанг бекор бўлганди. 

Даъвогарлар жанги ғолиби вақтинчалик камарни қўлга киритиш баробарида pound-for-pound рейтингининг собиқ етакчиси, мексикалик Сауль Альваресга қарши тўлақонли чемпионлик учун рингга кўтарилиш имкониятига эга бўлади.