Хирн: "Дана Уайт ва UFC Фьюри — Жошуа жангини ташкил қилмайди"

Аввалроқ Уайт 11 декабрга режалаштирилган британиялик боксчилар ўртасидаги жангни тарғиб қилиш билан шуғулланиши ва Netflix учун трансляция продюсери бўлишини айтганди. Бироқ Хирннинг таъкидлашича, амалдаги шартнома бунга йўл қўймайди.

«Бизнинг шартномамиз бўйича у бундай қила олмайди. Вазият шундай. Sela компанияси бизга Уайт ва UFC трансляцияни тайёрлаш билан шуғулланмаслигини ёзма равишда тасдиқлади», — деди Хирн.

Унинг сўзларига кўра, трансляцияни Фьюрининг Маҳмудовга қарши жанги устида ҳам ишлаган Whisper компанияси тайёрлайди. Компания Фьюри — Жошуа жангини Netflix учун трансляция қилиш бўйича шартномага эга.

«Агар улар трансляцияга оид шартнома шартларини ўзгартиришни муҳокама қилмоқчи бўлса, гаплашишга тайёрман. Бу қандай кўринишда бўлишини кўрсатишсин. Лекин бу мени унчалик ташвишга солмайди. Бу курашда мен аллақачон ғалаба қозондим», — дея Хирннинг сўзларини келтиради iFL TV.