Хоккайдо шаҳри замонавий бешкурашчиларимизни қабул қилади

Ана энди Ўзбекистон замонавий бешкураш федерацияси олдида лицензия олган икки нафар вакилимизни бўлажак Олимпия ўйинларига муносиб тайёрлаш вазифаси турибди. Айни шу масалалар юзасидан Ўзбекистон замонавий бешкураш федерацияси Бош котиби Ксения Гулямова Япония Вазирлар Маҳкамасининг Токио-2020 Олимпия ва Паралимпия ўйинлари бўйича департамент раҳбарининг ўринбосари Мики Камура билан учрашди. 

Учрашувда “Мезбон шаҳар ташаббуси” дастури муҳокама қилинди. Мазкур дастур ўзида Токио-2020 йўлида спортчиларни қўллаб-қувватлаш ва меҳмондўстлик ғояларини тарғиб қилади. Шунингдек, унинг доирасида миллатлараро маданият алмашинуви, иқтисодий ҳамкорлик масалалари ҳам кўриб чиқилади. 

Айни пайтгача Япониянинг Нагоя, Майдзуру ва Такасаки шаҳарлари Олимпия ўйинларидан аввал ўзбек спортчиларини ўқув-машғулот йиғинларини ўтказиш учун қабул қилишлари борасида келишувга эришилган эди. Мазкур учрашувдан сўнг ушбу шаҳарлар орасига Хоккайдо ҳам қўшилди. Бу ерда бешкурашчиларимиз ўқув-машғулот йиғинларини ўтказиб, Олимпия ўйинларига қадар маҳаллий иқлимга мослашиб олишади.  Ушбу шаҳар от спортининг конкур йўналиши бўйича йирик мусобақалардан бирини қабул қилади ва бешкурашчиларимиз шуғулланиши учун муносиб жойдир. 

Маълумот учун, айни пайтда замонавий бешкураш бўйича терма жамоамиз Кипрнинг Лимассол шаҳрида ўқув-машғулот йиғинини олиб бормоқда. Федерация мутасаддилари эса спортчиларимизнинг Олимпия ўйинларига муносиб тайёрланишлари учун барча шароитларни яратишга уринмоқда.