ХОҚ ва ЖССТ ўртасида янги меморандум имзоланди

Жумладан, жисмоний фаоллик, спорт ҳамма учун, тамакисиз Олимпия ўйинлари ва болаларнинг семириб кетишини олдини олиш каби мавзулар ҳамкорликнинг асосий ғояларидан бўлиб турибди. Швейцариянинг Лозанна шаҳрида мазкур икки ташкилот раҳбарлари Тедрос Аданом Гебреисус (ЖССТ) ва Томас Бах (ХОҚ) ўртасида ҳамкорликни янада кучайтириш борасида келишув имзоланди.

Меморандумда таъкидланганидек, томонлар дунё аҳолиси орасида юрак-қон томир, саратон, диабет ва кўплаб юқумли касалликларга чалиниш хавфини камайтирадиган тадбир ва стратегияларни илгари суриш бўйича иш олиб боради. Статистик маълумотларга кўра, юқумли бўлмаган касалликлар натижасида ҳар йили 35 миллион киши (9-60 ёш оралиғи) ҳаётдан бевақт кўз юмади. Жисмоний фаолликнинг етишмовчилиги натижасида эса ҳар йили қарийб 2 миллион инсон вафот этади.

Ҳар икки ташкилот 1984 йилдан бери ҳамкорликда фаолият олиб боради. Натижада ўтган давр оралиғида соғлом турмуш тарзи, оммавий спорт ва Олимпия ҳаракати ғоялари Ер юзида сезиларли даражада ошди. Томонларнинг кейинги ҳамкорлиги коронавирус пандемияси авж олган мана шу даврга тўғри келмоқда.

“Биз ХОҚда Ўйинлар ҳамма учун хавфсиз муҳитда ташкил этилиши керак, деган тамойилни ўрнатдик. Шу сабабдан ЖССТ билан февраль ойидан мазкур йўналиш бўйича ишчи гуруҳ фаолиятини бошладик. Биз Жаҳон соғлиқни сақлаш ташкилотининг келажакдаги мусобақалар учун хавфсиз муҳитни таъминлаши учун қўллаб-қувватлашига ва маслаҳатига умид қиламиз”, – деди Томас Бах.