Хоразмда полвонлар беллашмоқда

Дастлаб 2007-2008 йилларда туғилган ўсмирлар ва қизлар бел олишнинг чалиш йўналишида ғолиблик учун гиламга чиқишди. 

Ўзбекистон спортни ривожлантириш вазирлиги ҳамда Ўзбекистон белбоғли, бел олиш ва уч кураш миллий ассоциациясининг йиллик- тақвим режасидан ўрин олган мазкур кубок баҳсларида Қорақалпоғистон  Республикаси, деярли барча вилоятлар ва Тошкент шаҳридан келган 500 нафардан зиёд иқтидорли йигит-қизлар ғолиблик учун ўз имкониятларини синовдан ўтказишди.

Қизғин ва муросасиз кечган бел олиш курашининг чалиш йўналишида Темурбек Худойназаров, Саврина Жўрақулова, Комила Болтабоева, Жаҳонгир Шерметовлар ўз вазн тоифаларида Ўзбекистон кубоги ғолибига  айланишди.

Мусобақанинг иккинчи куни катталар бел олиш курашининг белбоғли йўналишида ўз имкониятларини синовдан ўтказишди. 72 кг вазн тоифасида ўтган кубок баҳсларида Сирдарё вилояти вакили Нодирбек Тўлагановга тенг келадиган рақиб топилмади. 

78 кг вазн тоифасидаги полвонлар курашида омад наманганлик Умиджон Холматовга насиб этди. 90 кг вазнда Фарғона вилояти вакили Ойбек Каримов соф ғалабага эришди.