Хоразмда велоспорт бўйича «Ҳоким кубоги» мусобақаси йўлга қўйилади

Ўзбекистон велосипед спорти федерацияси раҳбарияти Хоразм вилоятига қилган ташрифи давомида ҳудудда ушбу спорт тарғиботини янада ошириш масалалари бўйича истиқболли режаларни муҳокама қилди.

Хоразм вилояти ҳокимияти мутасаддилари иштирокида кечган йиғилишда Ўзбекистон велосипед спорти федерацияси бош котиби Козим Ўринбойхўжаев, федерация маслаҳатчиси Фарруҳ Худойқулов, вилоят Жисмоний тарбия ва спорт бошқармаси бошлиғи Нодира Жуманиёзова ва бошқа бир қатор соҳа мутасаддилари иштирок этди. Йиғилиш давомида федерациянинг вилоятдаги бўлими учун раҳбар ва ижрочи директор сайланди. Унга кўра, Хоразм вилоят ҳокимининг биринчи ўринбосари Қудрат Игамбердиев федерациянинг вилоят бўлими раиси, вилоят транспорт бошқармаси бошлиғи Раҳматжон Бобоев ва Анваржон Раҳмонов унинг ўринбосари, Амонбой Жуманов эса Ижрочи директор этиб сайланди.

Сафар давомида Хоразм вилояти ҳокими Фарҳод Эрманов билан учрашув бўлиб ўтди. Унда вилоят ҳокими Хоразмда велоспорт ривожига ҳисса қўшишдан миннатдор эканлигини, бунинг учун барча шароитларни яратиб беришга тайёрлигини билдирди. Суҳбатда бир қатор истиқболли режа ва дастурлар белгилаб олинди. 

Унга кўра, эндиликда вилоят федерация бўлими ҳокимлик томонидан “Дамас” автомобили билан таъминланади. Август ойида вилоятда “Save aral” халқаро веломарафон ўтказилиши ҳам муҳокама қилинди. Қолаверса, Фарҳод Эрманов томонидан маҳалла-туман-вилоят босқичида велоспорт бўйича “Ҳоким кубоги” мусобақаларини ташкил этиш ташаббуси бир овоздан маъқулланди. 

Шубҳасиз, бундай мусобақалар Республикада спорт оммавийлигини ошириш, терма жамоа учун муносиб захира спортчиларини саралаш йўлида катта қадам бўлади.