"Хумо" клуби иштирок этадиган "Pro Hokei Ligasy" қачон старт олади?

Икки йиллик танаффусдан сўнг юртимизга хоккей қайтмоқда. Хўш, ушбу чемпионатда янги мавсум қачон старт олади? Эътиборингизга "Pro Hokei Ligasy" ҳақида маълумотларни тақим этамиз. 

Қозоғистон чемпионатининг 2022-2023 йилги мавсуми ўз тарихида 31-бор бўлиб ўтади. Мунтазам чемпионат 5 сентябрь куни старт олади ва 2023 йил февралига қадар давом этади. "Pro Hokei Ligasy"нинг плей-офф баҳслари март ойида бошланиб, 27 апрель куни якунланади. 

Ушбу чемпионатда ўтган йили 13 та жамоа иштирок этган. Мунтазам чемпионат баҳслари бир босқичдан иборат бўлиб, унда ҳар бир клуб 48 та ўйин ўтказади. Мунтазам чемпионат якунларига кўра, 1-8-ўринларни эгаллаган жамоалар плей-офф босқичига йўл олади. Плей-офф серияси эса чорак финал, ярим финал ва финалдан иборат. Финалда чемпионат ғолиби ва иккинчи ўрин соҳиби аниқланса, ярим финалда мағлуб бўлган, аммо мунтазам чемпионатда юқорироқ ўринни эгаллаган жамоа бронза медали соҳибига айланади. 

Эслатиб ўтамиз, бунгача "Ҳумо" хоккей клуби Қозоғистон чемпионатида 2019-2020 йилги мавсумда иштирок этган ва 10-ўринни эгаллаганди.