20 ноя 21:09
Янгиликлар

Каратэ

Хушхабар: Ўзбекистонлик каратэчи тарихда илк бор WKF бўйича жаҳон чемпиони бўлди

Теглар : Каратэ

Хабарингиз бор, шу кунларда БААнинг Дубай шаҳрида каратэ WKF бўйича катталар ўртасида навбатдаги жаҳон чемпионати баҳслари бўлиб ўтмоқда.

Мусобақада дунёнинг беш қитъасидаги 104та давлатдан жами 983 нафар спортчи ғолиблик учун татамига чиқишди. Ушбу жаҳон чемпионатига Ўткам Бекпўлатов бошчилигида 15 нафар каратэчимиз жўнаб кетишган эди.

Бироз аввал эркаклар ўртасида -75 кг вазн тоифасида финал жанги ўтказилди. Унда каратэ WКF бўйича миллий терма жамоамиз аъзоси, спорт яккакурашлари бўйича Республика олий спорт маҳорати мактаби спортчиси Достонбек Отаболаев АҚШ вакили Томас Скотт устидан ишончли ғалабага эришди ва Ўзбекистонга тарихий ОЛТИН МЕДАЛЬни тақдим этди.

Айни дақиқаларда жаҳон чемпионатининг ҳал қилувчи жанглари давом этмоқда ва ҳозирда вакилларимиз яна 4та бронза медалини қўлга киритиш имкониятига эгалар.

Эслатиб ўтамиз, каратэ WКF бўйича Ўзбекистон терма жамоаси аъзолари 23 ноябрь куни тунда юртимизга қайтиб келишади.