16 апр 07:54
Янгиликлар

Эшкак эшиш, Олимпия ўйинлари

Хушхабарлар давом этади: Буэнос-Айресга навбатдаги йўлланма!

Барселонада байдарка ва каноэда эшкак эшиш бўйича ўсмирлар ўртасида бўлиб ўтган жаҳон чемпионатида учинчи спортчимиз ўсмирлар Олимпия ўйинларига йўлланмани қўлга киритди.

Спринт ва слалом баҳсларида Ислом Абдусаломов, худди шу йўналишда қизлар ўртасида Гулбаҳор Файзиева совриндорлар қаторидан ўрин эгаллаб, октябрь ойида Буэнос-Айресда бўлиб ўтадиган III ёзги ўсмирлар Олимпия ўйинларига лицензияни қўлга киритишганди.

Кеча яна бир ёш спортчимиз Шерзод Ҳакимжонов (Чирчиқ) ҳам ўсмирлар Олимпия ўйинлари меъёрини бажариб, Аргентинадаги нуфузли мусобақада қатнашиш ҳуқуқини қўлга киритди.

Шу тариқа, байдарка ва каноэчиларимиз Барселонадаги жаҳон чемпионатида тўрт имкониятдан учта йўлланмага сазовор булишди. Аввалроқ, вакилларимиз академик эшкак эшиш бўйича ҳам иккита йўлланмани нақд қилиб қўйишганди.