Яна бир ўзбекистонлик АҚШда проф боксдаги фаолиятини бошламоқда

Бухоролик боксчи Сардор Ёрмуҳамедов фаолиятини профессионал боксда давом эттирмоқда. Боксчи кеча машғулотларга киришиш мақсадида АҚШга жўнаб кетди. Маълум қилинишича, Ёрмуҳамедов "Warriors" компанияси билан шартнома имзолаган.

“Профессионал боксга ўтдим. Машғулотларни бошлаш учун АҚШга келдим. Промоушен билан аллақачон шартнома имзолаган эдик. Ҳамма шартлари келишилган, Майамига келиб жойлашдим. Энди илк жанг ҳақида гаплашамиз. Унгача спорт формамни тиклашим ҳамда вазн ташлашим керак”, - деди Сардор olamsport.com сайти мухбири билан суҳбатда.