Ёш шахматчиларимиз жаҳон чемпионатида яхши старт олишди

Бу галги жаҳон чемпионати 8, 10 ҳамда 12 ёшли шахматчилар ўртасида ташкил этиляпти. Дунёнинг 100га яқин мамлакатидан истеъдодли шахматчилар иштирок этаётган мусобақада Ўзбекистон терма жамоаси аъзолари ҳам тўлиқ таркибда медаллар учун бахс олиб боришмоқда.

Таркибдан ака-ука жаҳон чемпионлари Исломбек ва Жавоҳир Синдаров, Осиё чемпиони Ҳумоюн Бекмуродов, қизлардан Мафтуна Бобомуродова, Юлия Хегай ва Афруза Ҳамдамовалар жой олишган.

Ҳамюртларимиздан биргина Ҳумоюн Бекмуродов рақиби билан дуранг ўйнади. Қолган шахматчиларимиз рақибларини мағлубиятга учратишди. Ўн икки ёшли шахматчилар мусобақасида иккинчи тартиб рақамли иштирокчи бўлган Жавоҳир Синдоров франциялик Том Декуигниерени таслим этди.

Ўн ёшли шахматчилар баҳсида биринчи рақам остида таснифланган Исломбек Синдоров қора доналарда ўйнашига қарамай, швейцариялик Гавин Вейфелдан устун келди.

Қизларимиздан Юлия Хегай арманистонлик Хамшик Кочинянни, Мафтуна Бобомуродова яна бир арман шахматчиси Тамар Гогинянни, Афруза Ҳамдамова эса қора доналарда ўйнашига қарамай, рейтингда ўзидан анча юқорида турган туркиялик Зерен Элиф Йилдизни мағлубиятга учратди.