Ёш шахматчиларимизнинг Батумидаги “триумфи”+ФОТО!

Ўз тарихида тўртинчи бор ўтказилган Батуми фестивалида 10та давлатдан 37 нафар шахматчи дона сурди. Улар орасида ўзбекистонлик шахматчилар ҳам муваффақиятли тарзда олимлашди. 

Жумладан, Жаҳонгир Комилов 8 ёшгача шахматчилар мусобақасида 9 имкониятдан 8,5 очко жамғариб, халқаро фестивал ғолибига айланди. Ўн уч ёшли халқаро мастер Жавоҳир Синдаров (2474) эса 10-рақам остида ҳаракат қилганига қарамай, асосий турнирда 6 очко билан кучли учликдан жой олди. 

Синдаров 9та партиядан фақат биттасида грузиялик халқаро гроссмейстер Леван Панцулаве (2575)га 6-турда имкониятни бой бериб қўйди. Жавоҳир 4та учрашувда ғалаба қозонди ва яна шунча партияда дуранг ўйнади.

Синдаров грузиялик гроссмейстерлар - Гига Гупарашзе ва Давит Магхалашвили билан муросага келди. Рейтингда биринчи ўринда турган қозоғистонлик халқаро гроссмейстер Ринат Жумабаевни мағлуб этгани эса ҳақиқий шов-шувга сабабчи бўлди. 

Шахматчиларимиздан Робияхон Сардорова C Open мусобақасида иштирок этди ва 6,5 очко билан умумий қатнашчилар орасида 5, аёл шахматчилар ўртасида эса 1-ўринни эгаллади. 

Бундан ташқари, Батуми фестивалида FM Ортиқ Ниғматов (2461) ва Бобур Сатторов (2328) ҳам ўз имкониятини синовдан ўтказди. Энди шахматчиларимиз худди шу таркиб билан 13-20 июль кунлари Грузиянинг Поти шаҳрида ўтказиладиган 13-халқаро шахмат фестивалида иштирок этишади.