Ёш спортчиларга 1 миллиард сўмга яқин спорт анжомлари ажратилди

Республика жисмоний тарбия ва спортни ривожлантириш жамғармаси томонидан ушбу йўналишда бир қатор лойиҳалар амалга оширилмоқда. Жумладан, чекка ҳудудларда, асосан қишлоқ жойларда қурилиб эртамиз эгалари ихтиёрига топширилаётган спорт иншоотлари, уларда яратилаётган қулай шароитлар туфайли спортчи ёшлар сони тобора ошиб бормоқда.

Бу борадаги ижобий ишларни Тошкент вилоятида ҳам кузатиш мумкин. Биргина жорий йилнинг январь ойида Жисмоний тарбия ва спортни ривожлантириш жамғармасининг вилоят бўлими томонидан Болалар ва ўсмирлар спорт мактабларига 50 турдаги спорт жиҳозлари тарқатилди.

- Шуниси эътиборлики, Жисмоний тарбия ва спортни ривожлантириш жамғармаси томонидан узоқ ҳудудларда жойлашган Болалар ва ўсмирлар спорт мактабларининг тарбияланувчилари учун спорт жиҳозлари, жумладан татамилар, футбол, баскетбол, волейбол коптоклари, шунингдек бадиий гимнастикачи қизлар ва боксчи ёшларга 1 миллиард сўмга яқин спорт буюмлари етказиб берилди, - дейди биз билан суҳбатда Тошкент вилоят жисмоний тарбия ва спорт бошқармаси бошлиғи Дониёр Рисқибоев.

Шуни таъкидлаш керак, тарқатилаётган спорт анжомларининг деярли барчаси маҳаллий корхоналар томонидан ишлаб чиқарилган.