Ёшларга Наврўз туҳфаси

Наврўз умумхалқ байрами арафасида, аниқроғи 20 март куни Мирзо Улуғбек туманидаги “Катта Қорасув” маҳалласи ҳудудида янги ёпиқ турдаги бассейн фойдаланишга топширилди.

Жисмоний тарбия ва спортни ривожлантириш жамғармаси маблағлари ҳисобига барпо этилган объектнинг очилиш маросимида Жисмоний тарбия ва спорт вазири Дилмурод Набиев, давлат ва жамоат ташкилотлари вакиллари, спортчилар, ёшлар иштирок этди.

Мазкур мажмуани қуриш учун жамғарма маблағлари ҳисобидан 5 миллиард сўм ажратилди. Ўлчами 11х25 метр бўлган ёпиқ сузиш ҳавзасида мураббийлар ҳамда сув спорти билан шуғулланувчилар учун ювиниш, кийиниш, дам олиш, тиббиёт хоналари, сувнинг таркиби, сифати назорат қилинадиган лаборатория ва энг муҳими, болалар ва ўсмирлар ўртасидаги мусобақаларни кузатиб бориш учун томошабинларга ўриндиқлар ҳам мавжуд.

Мирзо Улуғбек тумани 1-сонли болалар-ўсмирлар спорт мактаби ихтиёрига берилган мазкур иншоотда бир кунда 120 нафар ўғил-қиз сузиш спорти сирларини ўрганиши мумкин. Қолаверса, янги мажмуа ёшларнинг машғулотларидан бўш вақтларида аҳолига ҳам хизмат кўрсатиши кўзда тутилган.

Яна бир эътиборга молик жиҳат, болалар ва ўсмирлар спорт мактабига жамғарма томонидан 52 турдаги 70 миллион сўмлик спорт жиҳозлари ҳам топширилди.