Юрт билан бирга югур

Ўзбекистон Республикаси Жисмоний тарбия ва спорт вазирлигида II Тошкент Халқаро марафони ташкилий қўмитасининг ОАВ учун матбуот Анжумани бўлиб ўтди.

Анжуманда Ўзбекистон Республикаси Бош вазири ўринбосари, Туризимни ривожлантириш Давлат қўмитаси Раиси, Марафон ташкилий қўмитаси раҳбари Азиз Абдуҳакимов, Жисмоний тарбия ва спорт вазири Дилмурод Набиев, Миллий Олимпия қўмитаси Бош котиби Ойбек Қосимов ва ташкилий қўмита аъзолари йиғилганлар ва ОАВ ходимларига II Тошкент Халқаро марафони ўтказиш борасида қилинаётган ишлар тўғрисида маълумот берди.

Таъкидлаш лозимки, 2020 йил 24 январдаги «Ўзбекистон Республикасида жисмоний тарбия ва спортни янада такомиллаштириш ва оммалаштириш чорବ-тадбирлари тўғрисида»ги Президент Фармонида 2020 йилдан бошлаб спорт соҳасида “Tashkent Marathon” халқаро марафони, “Save Aral” халқаро экомарафони, шунингдек авторалли ва мотокросс спорт мусобақаларини тизимли ўтказиш орқали мамлакатимизда спорт туризмини ривожлантириш вазифаси ҳам белгилаб берилган.

Мазкур топшириқ ижросини таъминлаш, қолаверса мамлакатимизда аҳоли саломатлигини мустаҳкамлаш ва ёшлар орасида соғлом турмуш тарзини фаол тарғиб қилиш мақсадида шу йил 6 декабрь куни II Тошкент Халқаро марафони ўтказилади.

Марафон иккита масофада ташкил этилади. Булар – узунлиги 42 км 195 м бўлган марафон ҳамда узунлиги 21 км 97,5 м бўлган ярим марафон югуриш мусобақаларидир. Марафон дистанцияси эса, World Athletics (Жаҳон енгил атлетикаси) нинг жамоавий аъзоси бўлган, AIMS (Халқаро узоқ масофа ва марафонлар ассоциацияси) томонидан сертификацияланган.

Югуришнинг старт-финиш чизиғи Афросиёб ва Бешёғоч кўчаларининг кесишувида, «Ҳумо Арена» муз саройи олдида жойлашган. Спортчиларнинг натижаларини максимал даражада аниқ билиб олиш учун вақт ўлчов чиплари ҳамда махсус транспондер тизимидан ҳам фойдаланилади. Марафон ва ярим марафон масофаларида вақт чеклови белгиланган бўлиб, спортчилар ушбу вақт давомида масофани якунлашлари шарт.

Марафон ва ярим марафон баҳсларида маррага етиб келган ҳар бир иштирокчига марра медали топширилади. Шунингдек, тадбир ташкилотчилари ва хомийлар тарафидан мусобақа ғолиблари ва иштирокчиларига қўшимча совғалар ҳам кўзда тутилган. Марафон ва ярим марафон иштирокчилари 18 ёшдан кичик бўлмаслиги лозим.

Тадбирдан кўзланган мақсад – шаҳримиз аҳолиси ва меҳмонлари орасида соғлом турмуш тарзини кенг тарғиб қилиш ва югуришни оммавийлаштириш, халқлар ўртасида дўстона алоқалар ва спорт туризмини ривожлантириш ҳамда Ўзбекистоннинг энг кучли марафончиларини аниқлашдан иборат.

II Тошкент халқаро марафонида 1-ўрин соҳиби – 30 миллион сўм (2-3-ўрин эгалари ҳам тақдирланади), ярим марафонда эса 1-ўринни эгаллаган атлет 12 миллион сўм (бу ерда ҳам 2-3-ўрин эгаларига пул мукофотлари белгиланган) пул мукофотлари билан тақдирланади.

Қўшимча маълумотлар www.uzmarathon.uz сайтида.