“Юртингиз афсонавий ўзбек велопойгачиси Абдужабборовнинг тезлигидек ривожланмоқда”

Бу мутахассис собиқ велоспортчи бўлиб, айни дамда ушбу спорт соҳасида жаҳоннинг энг етакчи мутахассисларидан бири ҳисобланади. Хусусан, 2012 йил Лондонда ўтказилган ёзги Олимпия ўйинларида велоспорт баҳсларида мусобақа ўтадиган ҳудуд инфраструктурасини ишлаб чиққан. Ушбу мутахассисни Миллий олимпия қўмитаси президенти Рустам Шоабдураҳмонов кутиб олди. 

“Вестминстер университетининг Тошкентдаги филиали юртимиздаги энг олди олий ўқув-юртларидан бири ҳисобланади. Бу даргоҳ ҳар йили мамлакатимиз учун юзлаб малакали кадрларни тайёрлаб бериши билан ҳурмат қозонган. Муҳтарам Президентимиз Ўзбекистонда спортни ривожлантириш йўлида хорижлик мутахассисларни жалб қилишга алоҳида урғу бермоқда. Қолаверса, мамлакатимизни ривожлантириш йўлида 5 та муҳим ташаббусдан бири ҳам айнан спортга қаратилган. Сизнинг велоспортга ҳам қизиқишингиз ушбу спорт ривожини юртимизда янги босқичга олиб чиқишига ишонаман”, – деди Рустам Шоабдураҳмонов. 

Ўз навбатида Питер Бонфилд ҳам юртимизга қилган ташрифидан олган таассуротлари ҳақида гапириб берди. 

“Олимпия ҳаракати дунёдаги барча инсонларни бир мақсадда бирлаштиради. Ўтган йили ҳам Ўзбекистонга ташриф буюрган эдим. Лекин бугун келиб, бутунлай бошқача қиёфа кўрмоқдаман. Юртингиз худди афсонавий ўзбек велоспортчиси Жамолиддин Абдужабборовнинг тезлигидек ривожланиб бормоқда. Сўнгги 20-30 йил ичида Буюк Британияда велоспорт ривожи катта босқичга чиқди. Бунда мамлакатимизда қўлланилган “UK active” лойиҳаси асосий омил бўлди. Мен ҳар доим жаҳонда велоспорт ривожланиши тарафдори бўлиб келганман. Бу йўлда қандай ёрдам керак бўлса, мен тайёрман”, – деди Питер Бонфилд. 

Суҳбат давомида ҳар икки томон ўзаро ҳамкорлик масалалари бўйича атрофлича муҳокама олиб боришди. Шунингдек, мартабали меҳмон 2 кундан сўнг пойтахтимизда ўтказилаётган велотрек бўйича мамлакат чемпионатига ташриф буюришини таъкидлаб ўтди.