Замонавий бешкураш: Алисе Фахрутдинова Жаҳон кубогида 14-ўринни эгаллади

Финал баҳсларида саралаш босқичидан муваффақиятли ўтган дунёнинг энг кучли 18 нафар спортчиси иштирок этди. Қувонарлиси, улар сафида Ўзбекистон вакиласи ҳам бор эди. Беш йўналишда ўтказилган баҳслар натижасига кўра, ҳамюртимиз, Токио-2020 ёзги Олимпиадаси қатнашчиси Алисе Фахрутдинова 14-ўринни эгаллади.

Жаҳон кубоги ғолиб ва совриндорлари:

1. Лева Серапинайте (Литва) – 1402,

2. Вероника Новотна (Чехия) – 1394,

3. Илке Ўзюксел (Туркия) – 1385, ...

14. Алисе Фахрутдинова (Ўзбекистон) – 1338.

Маълумот учун: замонавий бешкураш мусобақаларининг янги форматига кўра, энди баҳслар уч кун давом этади. Мусобақанинг дастлабки кунида асосий қиличбозлик йўналиши бўйича саралаш баҳслари ўтказилса, иккинчи кунги баҳсларда ярим финал иштирокчилари финал йўлланмалари учун курашади. Ниҳоят учинчи кунги баҳсларда финалчилар орасидан ғолиб ва совриндорлар аниқлаб олинади.

Ярим финал ва финал баҳсларида йўналишлар тартиби қуйидагича: конкур (отда тўсиқлардан сакраш), қиличбозлик (бонусли раунд), сузиш, лазер-ран.