Bahodir Jalolov Jahon chempionatidagi asosiy raqibi, Toshkentdagi prof boks kechasi haqida gapirdi

O'z tarixida yubiley - XX marotaba tashkil etilayotgan yilning eng nufuzli musobaqasida O'zbekiston terma jamoasi ham to'liq tarkibda ishtirok etadi. Biz qura natijalari malum bo'lganidan keyin eng og'ir vazn (+91 kg) toifasida yurtimiz sharafini himoya qiluvchi charm qo'lqop ustamiz Bahodir Jalolov bilan bog'lanib, undan kichik intervyu oldik. 

- Bahodir, qura qaysidir manoda bokschilarimiz uchun omadli keldi. Bu fikrga qo'shilasizmi?

- Ha, haqiqatan ham qura bizga birmuncha omadli keldi. Bir nechta vazn toifalarida asosiy raqiblarimiz musobaqa setkasining ikkinchi qismidan joy olishdi. Umuman olganda, jahon chempionatiga juda yaxshi tayyorgarlik ko'rdik. Mashg'ulotning yakuniy va shu bilan birga hal qiluvchi bosqichi bevosita musobaqa o'tkaziluvchi Ekaterinburg shahrida o'tkazildi. 

- SHaxsan o'zingizning raqiblaringiz haqida qanday fikrdasiz?

- Jahon chempionatiga kuchsiz bokschining o'zi kelmaydi. Ularning hammasi kamida o'z mamlakatlari chempionlari. Quraga ko'ra Xorvatiya, Rossiya, Ukraina, AQSH kabi mamlakat bokschilari bilan setkaning bir tomoniga joylashdim. Final yo'lida ular bilan to'qnash kelishim mumkin. Amerikalik yosh bokschi Kopa Amerikada ikkinchi o'rinni olgan. Lekin baribir asosiy raqib qozog'istonlik bokschi bo'lsa kerak. Hali bir hafta vaqt bor. Sabsizlik bilan bizning vazn toifasidagi janglarning boshlanishini kutyapman. 

- 29 sentyabr kuni Toshkentdagi professional boks oqshomida ringga chiqishingiz haqida ham malumot berildi. Jahon chempionatidan keyin bir hafta vaqt qoladi. Bu sizga qiyinchilik tug'dirmaydimi?

- Hozircha Toshkentdagi jang haqida o'ylamayapman. Bor etiborim jahon chempionatiga qaratilgan. O'z oldimga katta maqsad qo'yganman. Agar raqib topilsa, poytaxtimizda o'tadigan boks oqshomida ham ringga chiqaman. Tayyorgarlik pand bermaydi. Ekaterinburgdan qaytishimiz bilan yana mashg'ulotlarga kirishamiz.