Bir jang tarixi. Grigoyan vs Rivera. Mustaqil O'zbekiston tarixidagi ilk oltin kamar jangi haqida (FOTO+VIDEO)

Jang sanasi: 04.13.1996

Jang manzili: “Sporthalle Arena” Gamburg, Germaniya

Jangga qadar bokschilarning natijasi:

Artur Grigoryan: 18 ta jang, 18 ta g'alaba.

Antonio Rivera: 45 ta jang, 34 ta g'alaba, 9 ta mag'lubiyat, 2 ta durang.

Jang boshlanishi bilan Grigoryan ustunlikni qo'lga olishga harakat qildi. U birinchi raundda bir nechta aniq va kuchli zarbalar yo'llashga erishdi. Ikkinchi raundda esa jang biroz sekinlashdi va har ikki bokschi ham kam miqdorda zarba yo'lladi. Uchinchi uch daqiqalikda Grigoryan hamda Rivera ancha qo'shishdi va bir-birlariga zarbalar yo'llashdi. To'rtinchi va beshinchi raundlarda "Qirol Artur" to'liq ustunlikka ega bo'lib, raqibini qiyin ahvolga solib qo'ydi. Hujumlar oqimi oltinchi raundda ham to'xtamadi va Artur borgan sari g'alaba yaqinlashayotgan edi.

Ettinchi raundda hamyurtimiz biroz kuch tejab harakat qilgandek bo'lsa-da, ammo bir nechta yaxshi operkot zarbalari bilan raqibini qiynashda davom etdi. Sakkizinchi raundda Rivera beldan pastga zarba bergani uchun ring hakami undan ochko olib tashladi. To'qqizinchi raundda Antoni ancha charchab qoldi va buning natijasida bokschimiz raqibiga istalgancha zarba yo'llashga erishdi. O'ninchi va o'n birinchi raundlarda Artur bir necha bor raqibini muvozanatdan chiqarishga harakat qildi, ammo Rivera oyoqlarida turishga erishdi. 

Hal qiluvchi raundda "Qirol" kutilmaganda muvozanatni yo'qotdi va hakam hisobni ochdi. Lekin tezda o'ziga kelgan Artur raqibi bilan haqiqiy ochiq jangga kirishib ketdi, buning natijasida so'nggi raundning ikkinchi daqiqasida raqibini nokaut qilishga erishdi. 

SHu tariqa, Artur Grigoryan engil vazn toifasida WBA kamariga ega chiqdi. Bu mustaqil O'zbekistonning professional boksdagi ilk oltin kamari edi.

Nig'monxo'ja Nozimov tayyorladi