Bir jang tarixi. Meyvezer - Alvares. Bugungi kunning eng kuchli bokschisi Saulning ilk mag'lubiyati (FOTO+VIDEO)

Jang g'olibi WBA Super, WBC va Ring kamarlariga ega chiqishi lozim edi. Jang 2013 yilning 14 sentyabr kuni Las-Vegasda bo'lib o'tadi. Bu super to'qnashuv o'sha davrlarda bo'lgan deyarli barcha rekordlarni yangilagan. Jang uchun Floyd 75 million dollarga ega bo'lgan, bu esa o'sha vaqtdagi eng katta gonorar hisoblanardi.

SHuningdek, Alvares ham o'sha jangdan 20 million dollar ishlab olgan, u uchun ham bu rekord summa edi. Jangga qadar har ikki bokschi ham mag'lubiyat nima ekanligini bilmagan. Floyd 44 jang o'tkazib barchasida g'alaba qozongan bo'lsa, Saul esa 43 ta jang o'tkazib, 42 ta g'alaba va bitta durrang natijani qayd etgan edi. Jang to'liq Meyvezerning ustunligi ostida kechadi. U har bir raundda o'z ustunligini ko'rsatishga urinadi va bunga erishadi ham. Saulning jangi chiqmagani sababli, raqibiga taqiqlangan zarbalar yo'llashni boshlaydi, shu zahoti hakam unga bu harakatlari uchun jarima soladi. 

Meksikalik bokschi o'n birinchi raundda Meyvezerni bir necha marta «ushlash»ga erishadi, lekin bu urinishlar amerikalik engilmas bokschini nokaut qilishga kamlik qiladi. Jang to'liq o'n ikki raund davom etadi va bahsda ishlagan ikki hakam Meyvezerning g'alabasini elon qilishadi, ammo Si Jey Ross kutilmaganda jang durang natija bilan tugaganini elon qiladi, keyinchalik bu hakam istefoga chiqadi.

Jang videosini tomosha qiling:

Nig'monxo'ja Nozimov tayyorladi