Boks bo'yicha navbatdagi chempionat o'tkazildi

Ettinchi bor o'tkazilayotgan ananaviy chempionat harbiy xizmatchilar o'rtasida sportning ommaviyligini oshirish, ularning jismoniy tayyorgarligini kuchaytirish, iroda va qatiyatini mustahkamlashga qaratilgan.

– Janubi-g'arbiy maxsus harbiy okrug harbiy qismlaridan birida xizmatni o'tayapman, – deydi 64 kilogramm vazn toifasida g'oliblikni qo'lga kiritgan Baxtiyor Nidoev. – Yoshligimdan boks bilan shug'ullanaman. Harbiy xizmat davomida ham sportni tashlab qo'ymadim. Kelgusida xizmatni davom ettirib, harbiylar o'rtasidagi xalqaro musobaqalarda ham munosib ishtirok etishni maqsad qilganman.

Murosasiz kurashlarga boy o'tgan musobaqada Havo hujumidan mudofaa qo'shinlari va harbiy-havo kuchlari terma jamoasi umumjamoa hisobida birinchi o'rinni qo'lga kiritdi.

– Musobaqada 6 sportchimiz ishtirok etdi, – deydi Havo hujumidan mudofaa qo'shinlari va harbiy-havo kuchlari terma jamoasi boshlig'i SHerzod Yaxshiev. – To'rt vaznda jamoamiz azolari final janglarida qatnashdi va uchta bahsni o'z foydasiga hal qildi.

CHempionat g'olib va sovrindorlari tashkilotchilar tomonidan munosib rag'batlantirildi. Sovrinli o'rinlarni egallagan harbiy sportchilar O'zbekiston Respublikasi Mudofaa vazirining uchinchi darajali “Namunali xizmati uchun” ko'krak nishoni bilan taqdirlandi.