Boks. Licenziyadan voz kechgan maqulmi yoki tavakkal qilmaslik zarur?

8 vaznda O'zbekiston erkaklar terma jamoasi murabbiylari shtabi quyidagi tarkibni sinab ko'rdi:

-52kg: SHahobiddin Zoirov

-57kg: Mirazizbek Mirzahalilov

-63kg: Elnur Abduraimov

-69kg: Bobousmon Boturov

-75kg: Fanat Qahramonov

-81kg: Dilshodbek Ro'zmetov

-91kg: Sanjar Tursunov

+91kg: Bahodir Jalolov

Musobaqaning dastlabki bosqichda kutilmaganda -81 kg vazndagi yosh, umidli bokschimiz, Jahon chempionati kumush medali sohibi Dilshodbek Ro'zmetov mag'lubiyatga uchragan bo'lsa, -75 kg vazn toifasida Fanat Qahramonov chorak finalda Qozog'iston vakili Abilhan Amankulga, o'tish bosqichida esa Eron vakiliga imkoniyatni boy berib, licenziyani qo'lga kirita olmadilar. Qolgan barcha bokschilarimiz yarim finalgacha raqiblarini mag'lub etdi va 6 vaznda yo'llanma qo'lga kiritildi. Musobaqada albatta umumjamoa hisobida ham birinchi o'rinni olish vazifasi maqsad qilib qo'yilgan edi, har holda muxlislarimiz buni kutishgandi. Yarim finalda -52 kg vaznda SHahobiddin Zoirov Tailand vakili bilan bo'lgan jangda bir bosh ustunlik qilgan bo'lsada, hakamlar nima uchundir yakunda raqib foydasiga qaror chiqarishdi. -69 kg vaznda Bobousmon Boturov va -91 kg vaznda Sanjar Tursunovlarda esa yarim final janglarida bir muncha xatoliklar ko'zga tashlandi. Yakunda esa ushbu vazndagi bokschilarimiz bronza medali bilan kifoyalandilar. SHiddatli kechgan final janglarida 3 ta vaznda bokschilarimiz ringga ko'tarildilar. Amaldagi jahon chempionlari -57 kg da Mirazizbek Mirzahalilov va +91 kg vaznda Bahodir Jalolov raqiblarini yaqqol ustunlik bilan mag'lubiyatga uchratib g'olib bo'lgan bo'lsalar, -63kg vaznda Elnur Abduraimov va qozog'istonlik Zakir Sayfulin qarama-qarshiligi musobaqaning eng qiziqarli jangi bo'ldi desak mubolag'a bo'lmaydi. Yakunda qiyin kechgan jangda hamyurtimizning qo'li baland ko'tarildi. SHunday qilib yakunda 3 ta oltin va 3 ta bronza medalni qo'lga kiritgan termamiz umumjamoa hisobida birinchi o'rinni egalladi.

Ammo boshqa bir tomoni, ushbu musobaqada muxlislar va mening nazarimda murabbiylar ham bokschilardan 100 foiz qoniqish hosil qilmadilar. Bokschilarimizda raqib hujumi vaqtida bir joyda turib qolish, oyoq va gavda harakatlari bilan zarbaga chap berish, qarshi hujumda zarba o'tkazib yuborish, masofadan ishlashda yo'l qo'yilgan bir muncha hato va kamchiliklar ko'zga tashlandi. Albatta -81kg va -75 kg vaznda licenziya olish imkonimiz hali mavjud. May oyida Franciyada bo'lib o'tadigan yakuniy Jahon kvalifikacion turnirida bokschilar yana bir bora harakat qilib ko'rishadi. Bu erda qaysi bokschiga imkon berish esa murabbiylar tanloviga bog'liq. SHu o'rinda qo'shni Qozog'iston terma jamoasi 8 ta vaznning barchasida yo'llanmani qo'lga kiritgan bo'lsada -52 kg va -57 kg bokschilardan qoniqmay, Franciyaga ushbu vaznda boshqa bokschilarni olib borishlari mumkin ekanligi malum qilingan. Demak agarda biz licenziya olgan vaznlarda ham boshqa bokschilarni ham sinash maqsadida yakuniy jahon kvalifikacion turniriga yuborish mumkinmi degan savol ko'pchilikni qiziqtirishi tabiiy hol. Albatda. Agarda biron bir yo'llanma olgan "A" bokschining holati yuqori darajada emas deb topilsa, ushbu vaznda boshqa bir "B" sportchi yakuniy saralash turnirida sinab ko'rilishi mumkin. Faqat bu holatda birinchi "A" bokschi tomonidan olingan licenziya bekor qilinadi. Yani "B" bokschi licenziya olgan taqdirda o'z-o'zidan ushbu vaznda faqatgina u Olimpiadaga borishi mumkin bo'ladi. Agarda "B" bokschi licenziya ololmasa, demak ushbu vaznda Olimpiada o'yinlarida "A" bokschi ham, "B" bokschi ham ishtirok etmaydi. CHunki, har qanday vaziyatda birinchi licenziya bekor qilingan bo'ladi. Albatta, barcha vaznlarda bokschilarimizga omad tilab qolamiz va Olimpiadada vatanimiz bayrog'ini baland ko'tarishlariga tilakdoshmiz. Bizda hozircha shular.

Jalol Ahmedov tayyorladi

Ushbu masala yuzasidan muxlislarimiz fikri qiziq. Tanqid ostida qolgan bokschilarimiz licenziyasidan voz kechib, jahon saralash turniriga boshqa bokschini olib borgan yaxshimi yoki tavakkal qilmaslik lozimmi?