Bolalar sporti. CHiroqchidagi bog'chada kurashga oshno bolalar

Ayniqsa, bog'cha va maktab yoshidagi o'g'il-qizlarimizni sportga qiziqtirish va salomatliklarini mustahkamlash, istedodlarini ro'yobga chiqarish o'ta muhim. 

Bu boradagi ishlarga maktabgacha talim muassasalarida ham alohida etibor qaratilgan. Xususan, CHiroqchi tumanidagi “HELLO HAPPY KIDS” davlat xususiy sherikchilik asosidagi nodavlat maktabgacha talim muassasasida tarbiyalanayotgan 130 nafar o'g'il-qizlarning sportga oshno bo'lishlari va talim – tarbiya olishlari uchun  barcha shart-sharoitlar muhayyo etilgan. Bu maskanda jarayonlar eng avvalo davlatimiz madhiyasi yangrashdan va   ertalabki badantarbiya mashg'ulotlaridan boshlanadi.  

Tadbirkor Farhod Jumanov tomonidan tashkil etilgan mazkur bolalar bog'chasida Prezidentimiz tomonidan tasis etilgan 5 ta muhim tashabbusning ijrosi taminlanayotganiga guvoh bo'lishingiz mumkin. Jumladan , rasm chizish, raqs, kitobxonlik, kitobxonlik doirasida audio o'qitish, ingliz, rus tillarini  o'rganish, shaxmat – shashka, futbol kabi bir qator to'garaklar yo'lga qo'yilgan. Yaqinda tadbirkor F. Jumanov bog'chada yana bir xayrli ishga qo'l urdi. Jajji farzandlar  milliy kurashimiz bilan shug'ullanishlari uchun  kurash sport turi bo'yicha to'garakni yo'lga qo'ydi. Hozirda murabbiyi Umidjon Samadov qo'l ostida  25 nafar bolajonlar kurash sirlarni o'rganishni boshlashdi. Qiziq holat –  “HELLO HAPPY KIDS” ning mashg'ulot maydonchasida egniga ilk bor kurash kiyimini kiyib,  ilk bor kurash tushayotgan  4-5 yoshli bolalar xuddiki katta polvonlar singari harakat qilib, tezda usulga kirgani va raqibini “elka”  yoki “qo'shsha” qilayotganini ko'rib, hayron yoqangizni ushlaysiz va  polvonlik o'zbekning qonida borligiga yana bir amin bo'lasiz.

Ilhom RAHMONOV tayyorladi