Buenos-Ayresga xush kelibsiz! Sportchilar uchun koncert-shou tashkil etildi

Musobaqalarning o'tkazilish tizimi ham bir-biriga o'xshash. O'yinlar to'rt yilda bir marotaba tashkil qilinadi. O'smirlar Olimpiadasi ham muhit, saviya jihatidan katta Olimpiya o'yinlaridan qolishmaydi. Ushbu musobaqa yosh sportchilar uchun to'rt yillikning eng nufuzli o'yinlariga o'ziga yarasha tayyorgarlik vazifasini bajaradi.

To'g'ri, katta va kichik Olimpiadalar o'rtasida farq ham etarli. Masalan, Argentinada bayroq ko'tarish marosimi o'rniga sportchilar uchun «Argentinaga xush kelibsiz» nomli koncert-shou dasturi tashkil etildi. Katta arenadagi tadbirni boshlovchilar olib borishdi. Ishtirokchilarni III yozgi o'smirlar Olimpiya o'yinlarining timsoli – «Pandi» yaguari kutib oldi.

Sahnaga o'rnatilgan katta ekranda o'yinlarga tayyorgarliklar, ko'ngillilarning ish jarayoni, avvalgi Olimpiya o'yinlaridan lavhalar taqdim etildi. Musiqiy shou, raqslar esa kechaga ko'tarinki rux bag'ishladi. Etiboringizga ushbu tadbirdan olingan suratlarni taqdim etamiz.

Suratlar muallifi: Anvar Ilyasov