Davis Cup. Raqibimiz Bosniya va Gercogovinaning Toshkentga keladigan tarkibi malum

Avvalroq, I Jahon guruhi uchun pley-off bosqichi doirasida o'tkaziladigan bahsda terma jamoamiz sharafini himoya qiladigan tennischilarimiz tarkibi aniq bo'lgandi. Humoyun Sultonov, Sergey Fomin, Maksim SHin va Rahimbek Ibrohimov Bosniyaga qarshi bahs olib borish imkoniyatiga ega bo'lishgandi. 

O'z o'rnida Bosniya va Gercegoviniya terma jamoasi murabbiyi ham Toshkentga keladigan tarkibni oshkor qildi. Raqiblarimizning birinchi raketkasi tajribali Damir Jumhur. U o'z vaqtida dunyoning 23-raketkasi bo'lgan, ayni paytda ATP reytingida 82-o'rinni egallab turibdi. Nerman Fatich 395, Mirza Basich 562, Andrey Nedich esa 618-pog'onadan joy olgan.    

Malumot uchun, O'zbekiston - Bosniya va Gercegoviniya uchrashuvi 31 yanvar - 1 fevral kunlari poytaxtimizdagi Respublika Olimpiya zaxiralari tennis maktabi yopiq kortlarida tashkil etiladi. Ilk kungi uchrashuvlar soat 13:00da, 1 fevraldagisi esa 11:00 da boshlanadi.

Jamoalar shu kungacha o'zaro o'yin o'tkazishmagan. Bosniya va Gercegovina terma jamoasi so'nggi uchrashuvini o'tgan yilning sentyabrida I Jahon guruhi doirasida Xitoy Taypeyiga qarshi o'tkazib, 2:3 hisobida imkoniyatni boy bergan edi.