"Devis Kubogi". O'zbekiston terma jamoasining Bosniya va Gercegovinaga qarshi o'yini sanalari malum

Yodingizda bo'lsa, O'zbekiston terma jamoasi sentyabr oyida II Jahon guruhi doirasida Estoniyani qabul qilib, 3:1 hisobida g'alaba qozongan edi. Mazkur g'alaba orqali I Jahon guruhi uchun pley-off bosqichiga yo'l olgan terma jamoamizning keyingi raqibi Bosniya va Gercegovina bo'ladi.

Ushbu bahs 2025 yilning 31 yanvar — 1 fevral kunlari O'zbekistonda o'tkaziladi. Hozircha musobaqaga qaysi shahar yoki majmua mezbon bo'lishi, qanday kortda o'tkazilishi aniq emas. O'zbekiston terma jamoasi ushbu o'yinda g'alaba qozonish orqali yana I Jahon guruhiga qaytishi mumkin.

Jamoalar shu kungacha o'zaro o'yin o'tkazishmagan. Bosniya va Gercegovina terma jamoasi so'nggi o'yinini sentyabr oyida I Jahon guruhi doirasida Xitoy Taypeyiga qarshi o'tkazib, 2:3 hisobida imkoniyatni boy bergan edi.

Malumot uchun, O'zbekiston terma jamoasi "Devis Kubogi" reytingida 287,5 ochkoga ega bo'lgan holda 42-o'rinni egallab turibdi. Bosniya va Gercegovina esa reytingda 30-o'ringa joylashgan.