Dunyoning 830-raketkasi qaytishini g'alaba bilan nishonladi

Ayni paytda WTA reytingida 830-pog'onadan joy olgan Petra Kvitova qaytishini chiroyli g'alaba bilan qarshi oldi. CHexiyalik tennischi ilk davrada reytingda o'zidan deyarli 800 pog'ona yuqorida borayotgan ruminiyalik Irina-Kameliya Beguni mag'lubiyatga uchratdi - 7/5, 6/1.

Petra tennischilarning o'zaro uchrashuvlarida katta farq bilan oldinda bormoqda - 7:1. To'qson etti daqiqa davom etgan bahsda ikkala tennis malikasi ham 2 tadan eys zarbasini amalga oshirgan. Qo'shxatolar Beguda ko'proq bo'ldi - 5 ga 1. Breyklar bo'yicha esa Kvitova 5 ga 1 ko'rinishida ustunlik qildi. 

Malumot uchun, 35 yoshli Kvitova beshta mag'lubiyatdan iborat yoqimsiz seriyasiga barham berdi. U so'nggi bor 2023 yilning oktyabrida g'alaba qozongandi. Orada farzandli bo'ldi. Endi Uimbldon turnirining ikki karra g'olibasi ikkinchi davrada tunislik Ons Jaberga qarshi kortga chiqadi.