Dunyoning sobiq birinchi raketkasi Simona Xalep faoliyatini yakunladi

Hozirda WTA reytingida 870-pog'onada borayotgan Xalep Kluj-Napoka shahridagi WTA 250 toifasiga kiruvchi turnirning birinchi bosqichida italiyalik Lyuchiya Broncettiga 1/6, 1/6 hisobida imkoniyatni boy berib qo'ydi. Ushbu uchrashuvdan so'ng Simona arenaga yig'ilgan vatandoshlari bilan xayrlashdi va professional tennischilik faoliyatini yakunlaganini elon qildi. 

Xalep 2022-2024 yillar oralig'ida ijobiy doping-test natijasi tufayli barcha faoliyatdan chetlatilgan edi. O'tgan yili jazo muddatini o'tab kortga qaytgan Simona 6 ta uchrashuv o'tkazib, 5 tasida mag'lubiyatga uchradi. 

Malumot uchun, 2006 yilda professional faoliyatini boshlagan Simona Xalep jami 839 ta uchrashuv o'tkazib, 593 tasida (71%) g'alaba qozondi. Salkam 20 yillik faoliyati mobaynida u faqat mukofot pullarining o'zidan 40,5 mln AQSH dollari ishlab oldi. 2018 yilda ruminiyalik tennischi "Rollan Garros", 2019 yilda Uimbldon turnirida bosh sovrinni qo'lga kiritdi.