Etti tashkilot o'rtasida hamkorlik memorandumi imzolandi

O'zbekiston Milliy olimpiya qo'mitasida muhtaram Prezidentimiz tomonidan Oliy Majlisga yo'llangan Murojaatnomada belgilab berilgan topshiriqlar ijrosini taminlash, yurtimizda jismoniy tarbiya va sport bilan shug'ullanuvchilar sonini yanada oshirish maqsadida O'zbekiston Respublikasi Mudofaa vazirligi, O'zbekiston Respublikasi Ichki ishlar vazirligi, O'zbekiston Respublikasi Milliy Gvardiyasi, O'zbekiston Milliy olimpiya qo'mitasi, Yoshlar ishlari agentligi, O'zbekiston engil atletika va triatlon federaciyalari o'rtasida hamkorlik memorandumi imzolandi. Unda ushbu tashkilotlarning rahbariyati, sport jamoatchiligi vakillari va OAV xodimlari ishtirok etishdi.

Bo'lajak memorandum 5 yil muddatga mo'ljallangan bo'lib, xalqaro tajribalarni o'rgangan holda tomonlarning shaxsiy tarkibini sportga keng jalb qilish, ularning jismoniy tarbiya va sport bilan shug'ullanishlari uchun barcha sharoitlarni tayyorlash, terma jamoalarimiz zaxirasi uchun iqtidorli sportchilarni saralab olish kabi maqsadlarni o'zida mujassamlashtirgan.

Tadbir davomida memorandumning mazmun va mohiyati, tomonlarning majburiyati haqida to'xtalib o'tildi. SHundan so'ng tomonlar hamkorlik memorandumiga imzo chekishdi.

“Bu tashkilotlar doimo hamkorlikda ishlab kelishgan. Oldimizda bu yil Tokio Olimpiya va Paralimpiya o'yinlaridan tashqari Jang sanati va yopiq inshootlardagi Osiyo o'yinlari, Islom birdamligi o'yinlari kabi musobaqalar turibdi. Harbiy sohaga aloqador sportchilarimiz ham ko'plab topiladi. Ushbu musobaqalarni sanab o'tishimning yana bir sababi ularga ushbu tashkilotlar bilan hamkorlikda tayyorlanib, O'zbekiston nomini munosib himoya qilishdir. Qolaversa, bu orqali aholimizning barcha bo'g'inlariga sportning kirib borishini taminashdir”, – dedi MOQ Bosh kotibi Oybek Kasimov.

Hamkorlik memorandumi imzolangach ishtirokchilar uning sportimiz o'sishi uchun ne chog'lik ahamiyatli ekani haqida o'z fikrlarini bildirib o'tishdi. Xususan, O'zbekiston Respublikasi Ichki ishlar vazirligi hamda Yoshlar ishlari agentligi mutasaddilari so'zga chiqib, hamkorlikda ishlashdan mamnun ekanliklarini bildirib o'tishdi.