Farg'ona viloyatida ham ommaviy sport tadbirlariga etibor kuchaygan

Jumladan, dam olish kunlari Dang'ara tumanida IIBning tuman bo'limi, Jismoniy tarbiya va sport bo'limi hamda tumandagi “Arziktepa” mahalla fuqarolar yig'ini bilan hamkorlikda “Sportni sev, sport bilan yasha!” shiori ostida 4-sektordagi uyushmagan yoshlar, faxriylar va bolajonlar o'rtasida uch avlod vakillari ishtirokida shaxmat va stol tennisi musobaqalari tashkil etildi.

SHuningdek, Dang'ara tumani jismoniy tarbiya va sport bo'limi tashabbusi 3-sektorda mini-futbol bo'yicha “Hokim kubogi” musobaqasiga start berildi. Musobaqada 14 ta mahalladan 18-30 yoshgacha bo'lgan uyushmagan yoshlar ishtirok etishmoqda.

Viloyatning So'x tumanida ham jismoniy tarbiya va sport sohasini rivojlantirish, ayniqsa, futbolni ommalashtirish maqsadida tuman ichki ishlar bo'limi tashabbusi bilan sektorlar kesimida mini-futbol bo'yicha musobaqalarga start berildi.

Ayni kunda sektorlar kesimida musobaqalarning saralash bosqichi qizg'in davom etmoqda. Sektorlar kesimida finalga chiqqan jamoalar g'oliblikni qo'lga kiritish uchun tuman markazidagi “So'g'diyona” sport majmuasida maydonga chiqishadi.

SHuningdek, tuman maktablarida ham sportni rivojlantirishga qaratilgan turli tadbirlar tashkil etilayotir. Jumladan, tuman jismoniy tarbiya va sport bo'limi tashabbusi bilan 23-sonli umumi o'rta talim maktabi o'quvchilariga sport anjomlari – voleybol va futbol to'plari sovg'a qilindi.