Hasanboy Do'smatov ertaga tongda prof boksda debyut qiladi, uning 19 yoshli raqibi 16 ta jang o'tkazgan

Plaza De Toros arenasida o'tuvchi ushbu boks oqshomidan jami 11 ta jang o'rin olgan. Biz uchun ahamiyatlisi, anderkard jangdan avval, yani oxiridan hisoblaganda, uchinchi jangda hamyurtimiz Hasanboy Do'smatov ringga ko'tariladi.

Rio-2016 Olimpiadasi chempioni o'zining prof boksdagi debyut jangida meksikalik 19 yoshli bokschi Xesus Servantes Villanuevaga qarshi ringga chiqadi. Xesus yosh bo'lishiga qaramay, prof ringda 16 ta jang o'tkazgan. To'qqizta jangda g'alaba qozongan, shularning 5 tasi nokaut bilan. Hisobida 7 ta mag'lubiyat bo'lib, qizig'i, ularning barchasida nokautga uchragan. Barcha janglarini Meksikada o'tkazgan. Hozircha so'nggisi bo'lib turgan jangini shu yilning 4 oktyabr kuni Abraxam Rodrigesga qarshi o'tkazib, mag'lub bo'lgan.   

Bugun bokschilar ananaga ko'ra tarozidan o'tish marosimida ishtirok etishdi. Har ikki bokschi ham belgilangan vazn meyorini bajarishdi. Do'smatov 48 kg 200 gramm tosh bosdi. Boks oqshomi afsonaviy Oskar De La Xoyyaga tegishli Golden Boy Promotions promouterlik kompaniyasi tomonidan o'tkazilmoqda.