23 sen 04:44
Yangiliklar
![](/upload/storage/87715_220.jpg)
Jahon chempionati qahramonlari Toshkentda tantanali tarzda kutib olindi
Musobaqa yakunlariga ko'ra, O'zbekiston terma jamoasi azolari 3 ta oltin, 1 ta kumush va 1 ta bronza medallarini qo'lga kiritishdi. Qayd etish lozimki, hali xech qaysi jahon birinchiligida o'zbekistonlik bokschilar uchta oltin medalga ega chiqishmagandi.
Bugun tunda musobaqada ishtirok etgan bokschilarimiz O'zbekistonga etib kelishdi. Ular Islom Karimov nomidagi Toshkent xalqaro aeroportida tantanali ravishda kutib olindi. Kutib olish marosimida O'zbekiston Respublikasi Bosh vazirining birinchi o'rinbosari Ramatov Achilbay Jumaniyazovich, Milliy Olimpiya Qo'mitasi prezidenti Rustam SHoabdurahmonov, Jismoniy tarbiya va sport vaziri Dilmurod Nabiev, sport jamoatchiligi, muxlislar, OAV xodimlari va sportchilarning yaqinlari ishtirok etishdi.
Eslatib o'tamiz, musobaqada terma jamoamiz safida SHahobiddin Zoirov (-52 kg), Mirazizbek Mirzahalilov (-57 kg) va Bahodir Jalolov (+91 kg) oltin medalni qo'lga kiritdi. Dilshodbek Ro'zmetov (-81 kg) finalgacha etib bordi va kumush medalga sazovor bo'ldi. Bobousmon Baturov (-69 kg) esa bronza medalini terma jamoamizga taqdim etdi.
Qayd etish lozimki, O'zbekiston terma jamoasi musobaqa yakuniga ko'ra, umumjamoa hisobida birinchi o'rinni egalladi. Ikkinchi o'rinni esa 3 ta oltin, 1 ta bronza medali bilan mezbon Rossiya terma jamoasi band etdi. Kuchli uchlikka 1 ta oltin, 1 ta kumush va 4 ta bronza medalini qo'lga kiritgan Qozog'iston terma jamoasi bokschilari yakun yasashdi. Kuba (1 ta oltin, 1 ta kumush va 1 ta bronza) va Angliya terma jamoalari (1 ta kumush, 2 ta bronza) mos ravishda 4 va 5-o'rinni egalladi.
Fikrlar