Jahon chempionati sovrindori Islomjon Bahromovga Olimpiadada kimlar raqiblik qiladi? (Barcha tafsilotlar)

Musobaqada sport kurashlari bo'yicha terma jamoamiz ham ishtirok etadi. Olimpiadada 3 nafar erkin kurashchimiz, 3 nafar yunon-rim kurashchimiz va yagona ayol kurashchimiz gilamga chiqadi.

Olamsport.com Birlashgan kurash dunyosi (UWW) tasdiqlagan ro'yxatga ko'ra sportchilarimizga turnir doirasida kimlar raqib bo'lishi haqida malumot berib boradi.

O'tgan sonlarda erkin kurashchilarimiz G'ulomjon Abdullaev, Razambek Jamalov va Javrail SHapievning, shuningdek, ayollar kurashidagi yagona vakilamiz Aktenge Keunimjaevaning bo'lajak raqiblari haqida so'z yuritgan edik.

Navbat yunon-rum kurashidagi sportchilarimizga. Ilk vakilimiz 60 kg vazn toifasidagi Islomjon Bahromov.

Bahromov uchun bu faoliyatidagi debyut Olimpiada bo'ladi, Tokioda uning vaznida Elmurat Tasmuradov musobaqada ishtirok etgan edi. Tasmuradov hozirda yunon-rum terma jamoa jamoamiz murabbiyi. Islomjon Belgraddagi Jahon chempionatida bronza medalini qo'lga kiritish asnosida Parij Olimpiadasi yo'llanmasiga ham ega chiqqan edi.

Islomjonning Parijdagi chiqishi ertaga, 5 avgust kuniga to'g'ri keladi.

Islomjon Bahromovga Olimpiadada quyidagi yunon-rum kurashchilari raqiblik qilishi mumkin:

Abdelkarim Fergat (Jazoir)

Murad Mamadov (Ozarbayjon)

Liguo Sao (Xitoy)

Kevin De Armas (Kuba)

Moamen Moxamed (Misr)

Jamal Valizade (Qochoqlar mamlakati)

Mehdi Moxsen Najad (Eron)

Kenichiro Fumita (Yaponiya)

Aydos Sultangali (Qozog'iston)

Jolaman SHarshenbekov (Qirg'iziston)

Viktor Siobanu (Moldova)

Se Ung Ri (KXDR)

Razvan Arnaut (Ruminiya)

Georgiy Tibilov (Serbiya)

Enes Basar (Turkiya)

Rayber Rodriges (Venesuela).

Vaznning amaldagi g'olibi kubalik Luis Orta musobaqaga kelmagan. Kumush medal sohibi Fumita esa Parijda o'z medalini oltinga aylantirishga harakat qiladi. SHuningdek, bronza medali egalari xitoylik Valixan Sailike hamda Rossiya vakili Sergey Emelin ham bu safargi musobaqani o'tkazib yuboradi.

Islomjonning natijalariga to'xtalsak, u Jahon chempionatining bronza medali sohibi, Osiyo chempioni va ikki karra bronza medali sovrindori hisoblanadi.