Kriket trenerlarini tayyorlash bo'yicha amaliy harakat boshlandi

Xususan, O'zbekiston Kriket federaciyasi kriket bo'yicha ikki bosqichli   murabbiylarni (Level-1 Criket Coaching ) tayyorlash maqsadida O'zbekiston Respublikasi Sportni rivojlantirish vazirligi bilan hamkorlikda viloyatlarda jismoniy tarbiya o'qituvchilari, sport maktablari murabbiylarini jalb qilgan holda o'quv-yig'in mashg'ulotlarini boshladi. 

Ushbu ikki bosqichli o'quv-seminarga Pokiston Islom Respublikasidan taklif etilgan kriket bo'yicha oliy toifali trener Tohir Muhammad hamda O'KF raisi Aziz Mixlievlar olib borishmoqda. Ayni paytda mutaxassislar tomonidan Buxoro viloyatida 18 nafar jismoniy tarbiya va sport mutaxassislari ishtirokida birinchi boqich murabbiylik kursi o'tkazildi va yakunda ishtirokchilarga maxsus sertifikatlar topshirildi. 

Bu tartibdagi o'quv-seminarlari O'zbekiston Respublikasi sportni rivojlantirish vazirligi hamda O'zbekiston Kriket federaciyasining taqvim-rejasiga ko'ra, noyabr oyida Surxondaryo, Qashqadaryo, Samarqand, Farg'ona, Andijon va Toshkent viloyatida bo'lib o'tadi. 

SHuningdek, joriy yil dekabr oyida O'zbekiston Kriket federaciyasi Xalqaro Kriket Kengashining (ICC) mutaxassislarini jalb qilgan holda ikkinchi bosqich o'quv-seminarlarini o'tkazadi. Bunda seminar ishtirochilari o'quv-mashg'ulotlarni yakunlagach, imtihon topshirishadi va imtihonlardan muvaffaqiyatli o'tgan tinglovchilar Xalqaro Kriket Kengashining birinchi bosqichli xalqaro  kriket murrabbiysi guvohnomasiga ega bo'lishadi. 

Muhim jihati, birinchi bosqich xalqaro kriket murabbiylik guvohnomasini qo'lga kiritgan trenlar nafaqat mamlakatimizda balki xorijiy davlatlarda ham kriket bo'yicha trenerlik qilish imkoniyatiga ega bo'lishadi. 

Ilhom RAHMONOV tayyorladi