Navoiyda O'zbekiston chempionati boshlandi, ishtirokchilar orasida Milliy gvardiya jamoasi ham bor

Navoiy Olimpiya zaxiralari kollejida bo'lib o'tayotgan bahslarda bir qator yangi jamoalar ham ishtirok etishmoqda. Jumladan, O'zbekiston Respublikasi Milliy gvardiyasi, Mudofaa vazirligi hamda Toshkent davlat transport universitetining “Transportchilar” jamoalari musobaqada debyut qilishyapti.

Biroq, so'nggi yillarda mamlakatimizning etakchi jamoalaridan biriga aylangan, xususan OTMK, “O'ztelekom” kabi nomdor klublarimizga munosib raqobat taqdim etayotgan “Orient” jamoasining bu yilgi chempionatda ishtirok etmayotgani ko'ngilni xira qiladi.

29-bor o'tkazilayotgan mamlakat chempionatida quyidagi jamoalar ishtirok etmoqda:

“Jizzax davlat pedagogika instituti-Ziyokor” (Jizzax), Qo'qon davlat pedagogika instituti (Qo'qon), Qoraqalpog'iston Respublikasi (Nukus), Olmaliq tog'-metallurgiya kombinati (Olmaliq), “Navoiy davlat pedagogika instituti-Olimp” (Navoiy), Mudofaa vazirligi (Toshkent), Milliy gvardiya (Toshkent), “O'ztelekom” (Samarqand), “Transportchilar” (Toshkent), “Navoiy tog'-metallurgiya kombinati-So'g'diyona” (Navoiy), “Parvoz” (Namangan).

Kecha musobaqaning tantanali ochilish marosimi bo'lib o'tdi. Unda Navoiy viloyat Jismoniy tarbiya va sport boshqarmasi boshlig'i SHahlo Narzieva, O'zbekiston voleybol federaciyasi bosh kotibi Xusan Nasrullaev va boshqalar so'zga chiqib, musobaqada barcha jamoalarga omad tilashdi.

Musobaqaning ilk kunida qayd etilgan natijalar bilan tanishing:

QDPI (Qo'qon) – “JDPI-Ziyokor” (Jizzax) – 3:2

OTMK (Olmaliq) – Qoraqalpog'iston Respublikasi (Nukus) – 3:0

“NDPI-Olimp” (Navoiy) – Mudofaa vazirligi (Toshkent) – 3:0

“Transportchilar” (Toshkent) – “O'ztelekom” (Samarqand) – 0:3

“NTMK-So'g'diyona” – “Milliy gvardiya” (Toshkent) – 1:3

Musobaqa davom etmoqda.