Navoiyda voleybol bo'yicha qizlar o'rtasida xalqaro turnir bo'lib ztmoqda

Rejaga ko'ra, Osiyo voleybol konfederaciyasining yillik musobaqalar taqvimiga kiritilgan xalqaro turnirda Markaziy Osiyo davlatlari, yani Qozog'iston, Qirg'iziston, Tojikiston, Turkmaniston, Afg'oniston hamda O'zbekistonning 17 yoshgacha bo'lgan qizlar terma jamoalari ishtirok etishi belgilangan edi.

Afsuski, dunyoda pandemik vaziyat yana jiddiy tus olayotganligi sababli bazi davlatlarga o'z hukumati Navoiyga kelish uchun ruxsat berishmadi. Natijada xalqaro turnirga faqatgina Qirg'iziston hamda Tojikistondan jamoalar etib kelishdi.

Xalqaro turnirga etib kelolmagan davlatlar o'rnini to'ldirish maqsadida tashkilotchilar musobaqaga O'zbekistondan to'rtta jamoa qo'yishdi. Bular – asosini O'zbekiston qizlar terma jamoasi tashkil etgan “Olimp”, Samarqand, Qashqadaryo va Surxondaryo viloyatlarining mahoratli qizlaridan iborat “So'g'diyona”, Xorazm viloyati va Qoraqalpog'iston Respublikasi qizlaridan tashkil topgan “Humo” hamda o'z tarkibiga Farg'ona vodiysi viloyatlarining voleybolchi qizlarini jamlagan “Vodiy” jamoalaridir.

Musobaqaning tantanali ochilish marosimi o'tkazildi. Unda so'zga chiqqanlar voleybol dunyoda eng ommalashgan va rivojlangan sport turlaridan biri ekanligi, O'zbekistonda ham ushbu sport turini rivojlantirish masalasiga hukumat darajasida etibor qaratilayotgani, buning samarasi o'laroq mana shunday musobaqalar tashkil etilayotganligini alohida etirof etishdi.

Ochilish marosimiga mahalliy sanatkorlar va raqs ansambllarining chiqishlari o'zgacha fayz bag'ishladi. SHundan so'ng musobaqaga start berildi.

Voleybol bo'yicha U-17 qizlar o'rtasida xalqaro turnir tafsilotlari bilan tanishishni istasangiz, saytimizni kuzatib boring.