Nigina Abduraimova Split turnirining ilk davrasidayoq yutqazdi

Mukofot jamg'armasi 75 000 dollarni tashkil qiluvchi ushbu musobaqada Nigina Abduraimova ham o'z imkoniyatini sinovdan o'tkazyapti. Mamlakatimizning birinchi raketkasi ilk davrada xorvatiyalik Yana Fettga qarshi kortga chiqdi. Hamyurtimiz turnirning ikkinchi raketkasi bilan bo'lib o'tgan bahsda deyarli qarshilik ko'rsata olmadi - 3/6, 2/6. 

Taqqoslash uchun, Nigina Abduraimova WTA reytingida 240, Yana Fett esa 171-o'rinni egallab turibdi. Tennischilar shu kungacha o'zaro ikki marotaba to'qnash kelishgandi. 2016 yili Tokiodagi turnir doirasida o'tkazilgan ilk bahsda Fett g'alaba qozongan bo'lsa, o'tgan yili aynan Splitdagi turnirda Abduraimova etti yil avvalgi mag'lubiyat uchun revansh olgandi. Kechagi g'alaba orqali Yana yana hisobda oldinga chiqib oldi.