Novak Jokovichning ATP Yakuniy turniri finalidagi raqibi malum

Dunyoning sakkizinchi raketkasi bo'lib turgan Novak Jokovich musobaqaning birinchi finalchisiga aylangan edi. Rossiyalik Andrey Rublyov hamda norvegiyalik Kasper Ruud o'rtasidagi ikkinchi yarim final uchrashuvida serbiyalikning bosh sovrin uchun bahsdagi raqibi malum bo'ldi. 

Dunyoning to'rtinchi raketkasi sifatida harakat qilayotgan Ruud ATP reytingida ettinchi pog'onadan joy olgan rossiyalik hamkasbini ortiqcha qiyinchiliksiz mag'lub etdi - 6/2, 6/4. Kasper o'zaro uchrashuvlarda hamon hisobda ortda qolmoqda - 2:4. 

Roppa-rosa 70 daqiqa davom etgan bahsda Rublyov 9, Ruud esa 10 ta eys zarbasini amalga oshirgan. Ikkala tennischi ham qo'shxatoga yo'l qo'yishmadi. Faqat breyklar soni Kasperda ko'proq bo'ldi 4 ga 1. Ruud faoliyatida ilk bor ATP Finals turnirida bosh sovrin uchun kortga chiqadi. O'tgan yili birinchi marotaba ushbu turnirda qatnashgan norvegiyalik istedod egasi 1/2 finalda rossiyalik Daniil Medvedevga yutqazib qo'ygandi.

Agar Ruud bugungi finalda g'alaba qozonsa, Rafael Nadalni ortda qoldirgan holda mavsumni dunyoning ikkinchi raketkasi sifatida yakunlaydi. Mag'lub bo'lsa ham u reytingning uchinchi pog'onasiga ko'tarilib oladi. Kasper va Novak o'rtasidagi o'zaro uchrashuvlarda tajribali Jokovich 3:0 hisobida oldinda bormoqda.