“Olympic Day”: Sportimiz yulduzlari va sanatimiz darg'alari ishtirokida onlayn-muloqot

Xalqaro Olimpiya qo'mitasi tashkil topgan ushbu sana bu yil koronavirus pandemiyasi sabab o'zgacha tarzda o'tkazilyapti. Xalqaro olimpiya qo'mitasi qaroriga ko'ra, barcha mamlakatlar ushbu bayramni 23 iyun kuni arafasida nishonlashlari mumkinligi belgilangan.

Jumladan, O'zbekistonda ham Olimpiya kuni nishonlanyapti. Bundan bir necha daqiqa avval Zoom dasturi orqali onlayn-muloqot tarzida ana shunday tadbirlardan biri bo'lib o'tdi. Unda yurtimizning mashhur sportchilari, sportimiz mutasaddilari hamda sanatimiz darg'alari ishtirok etishdi. 

O'zbekiston Jismoniy tarbiya va sport vazirining birinchi o'rinbosari Ravshan Ermatov, Milliy Olimpiya qo'mitasi prezidenti Rustam SHoabdurahmonov, MOQ bosh kotibi Oybek Kasimov, MOQ Faxriylar kengashi raisi Komiljon Xudoyberganov video onlayn-muloqotda yurtimizning barcha sportchilarini Olimpiya kuni bilan muborakbod etishdi. 

Sportchilar nomidan Oksana CHusovitina, Muhammadqodir Abdullaev, Ekaterina Xilko, Husniddin Norbekov, Murodjon Ahmadaliev so'z olib, bayram munosabati bilan o'z fikrlarini bildirishdi. 

Video onlayn-muloqotda sanatkorlarimizdan O'zbekiston xalq artisti Erkin Komilov, Yodgor Sadiev, Farrux Zokirov, O'zbekiston Respublikasida xizmat ko'rsatgan artist Samandar Hamroqulov ishtirok etdi. Erkin Komilov sportchilarimizga bo'lajak Olimpiadada yuqori cho'qqilarni zabt etishga tilak bildirdi. 

Ushbu tadbir so'nggida qatnashchilarga Xalqaro olimpiya qo'mitasi prezidenti Tomas Bax yo'llagan tabrik namoyish etildi.