“Otam, onam va men - sog'lom sportchimiz”: Toshkent viloyati bosqichi g'oliblari aniqlandi

Toshkent viloyatida sportni yanada ommalashtirish, aholi o'rtasida sog'lom turmush tarzini keng targ'ib qilish va O'zbekiston Respublikasi Prezidentining 2020 yil 30 oktyabrdagi “Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida”gi Farmoni ijrosini taminlash maqsadida sport-talim muassasalari va turli korxona-tashkilotlarning ishchi-xodimlari hamda mahalla aholisi ishtirokida ertalabki badantarbiya mashg'ulotlari, yurish, yugurish kabi sport tadbirlari tashkil etilmoqda.

Aholi qatlamlarini bu kabi sport tadbirlariga faol jalb etishda haftaning dam olish kunlaridan unumli foydalanilmoqda. SHu kuni hafta davomida doimiy ish bilan band bo'lgan Toshkent viloyati aholisi vakillari o'z oilalari bilan sport tadbirlari va musobaqalarida ishtirok etmoqda.

Jumladan, ortda qolgan haftada viloyat bo'ylab, uch bosqichda “Otam, onam va men - sog'lom sportchimiz” shiori ostida "Quvnoq startlar" musobaqasi tashkil etildi. Dastlab, har bir mahallada g'oliblar nomiga aniqlik kiritib olingan bo'lsa, keyinchalik ular tuman bosqichida jam bo'lishdi.

O'tgan haftaning dam olish kunlari ushbu musobaqaning viloyat bosqichi CHirchiq davlat pedagogika instituti sport obektlarida tashkil etildi. Tumanlarda g'olib bo'lgan sportchi oilalar viloyat kubogi uchun kurash olib borishdi.

Musobaqa natijalariga ko'ra, 1-o'rinni Parkent tumanidan Tangriboevlar oilasi qo'lga kiritgan bo'lishsa, CHirchiq shahridan Iskandarovlar oilasi 2-o'ringa loyiq ko'rildi. 3-o'rin esa Zangiota tumanidan Qovunboevlar oilasiga nasib etdi.

Musobaqa yakunida g'olib va sovrindorlarga hamkor tashkilotlar tomonidan esdalik sovg'alari taqdim etildi.