O'zbek boksi yulduziga 2 xonali uyning kaliti topshirildi + FOTO

23 may kuni Surxondaryo viloyati hokimligida sport federaciyalari mutasaddilari, murabbiylar, sport jamoatchiligi va sportchi yoshlar ishtirokida o'tkazilgan uchrashuvda xalqaro maydonlarda Vatanimiz sharafini munosib himoya qilib kelayotgan bir guruh surxondaryolik yigit-qizlarningsport sohasida erishayotgan yutuqlari etirof etildi. Bu haqida viloyat hokimligi matbuot xizmati xabar qilmoqda. 

Tadbirda boks bo'yicha mamlakatimiz terma jamoasi azosi, xalqaro toifadagi sport ustasi, Jahon Kubogi sohibi, jahon hamda Osiyo chempionatlari sovrindori, ko'plab xalqaro musobaqalar g'olibi Bahodir Jalolovga Termiz shahrida bunyod etilgan barcha sharoitlarga ega 2 xonali uyning kaliti va egalik sertifikati topshirildi.

B.Jalolov 1994 yilning 8 iyulida Surxondaryo viloyatining Sariosiyo tumanida tug'ilgan. 2018-2019 yillarda o'tkazilgan professional boks janglari g'olibi.

Iqtidorli bokschimiz 2019 yilning aprel oyida AQSHning Nyu-York shtatida o'tkazilgan bahslarda “NABF Junior Heavyweight Title” titul kamarini, Tailandda bo'lib o'tgan Osiyo chempionatida oltin medalni qo'lga kiritgan. U hozirda 2020 yilda Yaponiyaning Tokio shahrida o'tkaziladigan yozgi Olimpiya o'yinlariga puxta hozirlik ko'rmoqda, deyiladi matbuot xizmati xabarida.