O'zbekiston delegaciyasi Yaponiyada antidoping tajribasini o'rganmoqda

Ishchi guruh vakillari Yaponiyaning antidoping sohasidagi etakchi tashkiloti – Japan Anti-Doping Agency (JADA) rahbariyati bilan uchrashuv o'tkazdi. Unda dopingga qarshi kurashish bo'yicha milliy siyosatni shakllantirish, davlat qo'llab-quvvatlovini taminlash, jismoniy tarbiya va sport tizimini halollik principlari asosida rivojlantirish borasidagi yapon tajribasi bilan yaqindan tanishildi.

SHuningdek, Yaponiyalik mutaxassislar tomonidan maxsus seminar tashkil etildi. Seminar davomida xalqaro dopingga qarshi kurash tizimining asosiy tashkiloti – The World Anti-Doping Agency (WADA) Tokio laboratoriyasi faoliyati, uning huquqiy maqomi, moddiy-texnika bazasi, ilmiy tadqiqot va tahlil jarayonlari hamda sportchilardan namunalar olish va ularni xalqaro standartlar asosida tahlil qilish uslublari batafsil tanishtirildi.

Uchrashuv va seminarlar doirasida tomonlar o'rtasida quyidagi masalalar muhokama qilindi:

• Antidoping sohasidagi davlat siyosatini takomillashtirish

• Sportda halollikni taminlashda qonunchilikning o'rni va amaliyoti

• Osiyo mintaqasidagi eng samarali antidoping tajribalarini O'zbekiston amaliyotiga joriy etish imkoniyatlari

• Yoshlar orasida dopingdan xoli sportni keng targ'ib qilish yo'llari

Takidlash lozimki, ushbu tashrif doirasida olingan amaliy tajriba va ilg'or yondashuvlar mamlakatimizda antidoping tizimini xalqaro standartlar asosida rivojlantirish, sportchilarimiz uchun halol va sog'lom raqobat muhitini yaratish, shuningdek, O'zbekistonning xalqaro sport maydonidagi nufuzini yanada yuksaltirishga xizmat qiladi.