O'zbekiston terma jamoasi bosh murabbiyi Marat Qurbonovga "Prezident sovg'asi" topshirildi + FOTO

Musobaqada o'zbekistonlik charm qo'lqop ustalari har qachongidanda muvaffaqiyatli ishtirok etib, 3 ta oltin, 1 ta kumush va 1 ta bronza medallarini qo'lga kiritishgandi. Bunday rekord natijaning qayd etilishida milliy terma jamoamiz ustozi Marat Qurbonovning ham ulkan hissasi bor. SHuni inobatga olgan holda bugun Marat Galievichga Prezident sovg'asi - "Treker" avtomobili va 100 million so'm miqdoridagi mukofot puli uchun sertifikat topshirildi.

Tajribali murabbiyga sovg'a tantanali ravishda, Milliy olimpiya qo'mitasi binosi oldida topshirildi. Unda O'zbekiston Milliy olimpiya qo'mitasi prezidenti Rustam SHoabdurahmonov, MOQ vice-prezidenti va O'zbekiston boks federaciyasi raisining birinchi o'rinbosari Saken Polatov, MOQ va O'zbekiston boks federaciyasi mutasaddilari ishtirok etishdi. 

Tadbirda so'zga chiqqan Rustam SHoabdurahmonov va Saken Polatov mana shunday mehnat, fidoyilik va albatta yuksak natijalar uchun Marat Qurbonovga minnatdorchilik bildirishdi. O'z navbatida murabbiy ko'rsatilgan etibordan xursand ekanligini, terma jamoamiz bundan keyin ham mana shunday tempda yuqori natijalar ko'rsatishda davom etishini takidlab o'tdi.

O'zbekiston boks federaciyasi matbuot xizmati