O'zbekistonlik voleybolchi Turkiya klubi bilan shartnoma imzoladi

Bu haqda O'zbekiston voleybol federaciyasi matbuot xizmati xabar qiladi.

Islomjon Sobirov 1995 yil 7 fevral kuni Farg'ona viloyatining O'zbekiston tumanida tug'ilgan. 2008 yildan tuman markazi Yaypan shahridagi 1-sonli bolalar va o'smirlar sport maktabida Madamin Nishonov qo'l ostida voleybol sporti sirlarini o'rganishni boshlagan.

U professional faoliyatini 2012 yil Toshkentning «Orient» voleybol klubida boshlagan. Keyinchalik Samarqandning «O'ztelekom» va Olmaliqning OTMK jamoalarida ham faoliyat olib borgan. SHu yillar ichida bir necha marotaba O'zbekiston chempioni va kubogini qo'lga kiritgan.

2014-2018 yillar davomida O'zbekiston davlat jismoniy tarbiya va sport universitetining bakalavriat, 2018-2020 yillarda Nukus davlat universitetining magistratura yo'nalishlarida tahsil olgan.

2013 yildan O'zbekiston milliy terma jamoasi sharafini himoya qilib kelmoqda. Milliy terma jamoa safida Islomjon Osiyo va xalqaro turnirlarda 71ta rasmiy uchrashuvlarda maydonga tushgan. 2019 yil Markaziy Osiyo chempionatida (Nepal) musobaqaning «Eng yaxshi hujumchisi» nominaciyasiga sazovor bo'lgan. 2020 yilda Xalqaro voleybol federaciyasining nufuzli agentliklaridan biri “CAAN Athletics” bilan hamkorlik shartnomasini imzoladi. Ushbu hamkorlik samarasi o'laroq I.Sobirov Turkiyaning “Alanya BelediyeSpor” klubi bilan shartnoma imzoladi va Evropa voleyboli sari ilk qadamini tashladi.

Biz hamyurtimizga kelgusi faoliyatida omad tilaymiz.